دجاج محمر على الطريقة المغربية

المقادير:
6دجاجات (الكمية حسب عدد الأشخاص)
التوابل
السمن
القزبور والمعدنوس
الحامض مصير
(ونتوما بداو غير بدجاجة وحدة)
طريقة التحضير:
نغسلو الدجاج بالملح والخل وسكينجبير ونخلوه إيبات في الترقيدة ديالو حتى للصباح ونغسلوه مزيان ونحطوه يتسقطر.
الشرمولة:
نحتاجوليها 3 معالق كبار سكينجبير
3 معالق خرقوم بلدي
ملعقة صغيرة مخلطة بسيبيسة وقعقلة مطحونين
2معالق كبار سمن
ملعقة كبيرة إبزار
ملعقة صغيرة قرفة
ثوم مدقوق 3 فصوص للدجاجة
قزبور ومعدنوس
نصف حامضة مصيرة مقطعة رقيقة
شوية من ملون اصطناعي
الملح غير شوية
الطريقة:
تنخلطو جميع المكونات مع كأس كبير من الماء، ثم كنبداو نرقدو الدجاج في الشرمولة ندخلوها مزيان ونحكوها ما بين لحم وجلدة الدجاج، وأيضا في وسطه، ثم كنربطو ليهم رجليهم – كنرقدو الدجاج ساعة ثم نزيدو عليه كأس ماء ونحطوه إيطيب على نار مهيلة حتى يغلى مزيان ثم نضيفو 4 بصلات مشلظين رقاق وكأس زيت مخلط رومي وبلدية، ونقلبو الدجاج على كرشو ونخلوه يطيب على نار مهيلة
منين يطيب الدجاج نجهدو العافية باش يتنقص المرق ثم نحيدو الدجاج من المرق ونحطوه في لاطة وندهنوه بالسمن أو الزبدة وندخلوه للفرن يتحمر.

كنسلقو الزيتون ونصفوه ونزيدو عليه مغرفة من المرق ونخلوه يشرب ليقامة مزيان، كنشحرو المرقة ليبقات على نار متوسطة مع التحراك حتي تولي عاقدة، في الأخير كنحطو الدجاج في طبق التقديم ونخويو شوية المرق ونزينو بالزيتون بالصحة والراحة.

اترك تعليقك

Please enter your comment!
Please enter your name here